3Jo | EMI | STEP |

Aiaakotonna atikirighi uru ngai Jon ghe pitiela

3 John

1 Aghi Jon, namu ngateva,

Apitipiti etam, masi kapughu eteva Gaeas, aghailousieinio tale voto koronna.

2 Masi kapughu eteva, alooloo sae va umasimasi tale masi nitoka me isaa akapa voto aue masina etam, nongina akilakila va maamauluaam ta Vau ngepona masina. 3 Nimasimasi eteva namungaili ia ghe ghaaieghila nau katoa kapuita ita aikaaia ngaitaua laghe mae sio me laghe auliaala vaalua karika ughe kasu vulila voto koronna. 4 Nau eteva anongonongo va natughu etoa la kasukasu tale salana koronna, masimasiaaghi namungaili.

5 Masi kapughu eteva, ughelei emasina uunguaam ta tau ngai kasua inangari etoa arongona ta utam kilakila katoa etaira. 6 Ailousiaam laghe auliaala tale ale manga. Urau mene ruu tani sausila tale aloannaira, poli ia o ase salana atikirighi eaamasimasi God. 7 Ta poli ararina ateae Iesu me laghe kasula, karika laghe annala tani ghaa righi niaisausi ta lo atoa karika la kilakila God. 8 Liuna avalua o me ita tani sausi isaa o ase taumattu tani uungu eitaua teeila tale voto koronna.

9 Aghe pitipiti lao sio ta taumattu ngatoa tale ale manga ateva, me Diotrepes, eaanna nonga tani muemueinila, karika aue anna tani nongo usila voto aghaaulia. 10 Liuna avalua o me marova amae, aue aghapasunga ngamasina voto egheelei me voto eaulia teeieghi karika masina. Me karika va egheelei nonga llo, ta etam aikoloaa tee lo atoa la ghaaikaaia me epaopao lo atoa vara la ghelei isaa o voto, me etiutiu vella tale ale manga.

11 Masi kapughu eteva, urau mene aimuli tee taumattu sesa, ta uaimuli tee taumattu masina. Lo ateva egheelei voto masina kapuna ia God, me lo ateva egheelei voto sesa, karika ghe kila God. 12 Ila akapa taumattu ngatoa la ghaaulia masi gheeleiaane Demetrius, me gheeleiaane elaolao aitaua tee inangarina God koronna. Aghi tee aghaulia masi gheeleiaane me am kilakila va kiukiu aghaulia koronna.

13 Oroi voto aghanna tani aulia etam, me karika aghanna tani piti tale uru ngai, 14 poli aghaiesoa tale ninanna va ghaisa ngarighi amae me italu aitara me italu aippooa.

Alooloo sae va luei aue toka etam, me kapum atoa oia la suula masimasiaaira ta ngetam, me uaulia masimasiaaghi ta kateva kateva ta kapuitalua atoa ona.